قازاق ينتەرنەت تەلەۆيزياسى

جۇڭگو انسۇيەر قاۋىمىنا مۇعجيزالى سيلىق- ديماش

رەداكتور : 王晓叶 | قاينارى : ورتالىق تەلەۆيزيا تورابى | ۋاقىتى : 22-01-2017 14:15

A-A+

 


قاڭتاردىڭ 21-كۇنى، سەنبىنىڭ تۇنگى 22:30 ۋاقىتى- ميلليوننان استام كورەرمەننىڭ «حۋنان» تەلەارناسىنىڭ  «ءانشى» باعدارلاماسىن اسىعا كۇتكەن ۋاقىتى بولدى. ءان سۇيەر قاۋىم ءار حالىقتا دا كوپ، ءانشى ءار حالىقتا بار ەكەنى سياقتى، جۋىقتان بەرگى جۇڭگوداعى كورىلىمى ەڭ جوعارى باعدارلامانىڭ ءبىرى «ءانشى» باعدارلاماسىنا قازاقستان ەلىنىڭ ۇكىلەپ قوسقان ءانشىسى ديماشتىڭ كەلىپ قاتىناسۋى قازاق ءۇشىن ماقتانىش پەن ءۇمىت بولسا، تۇتاس جۇڭگو تىڭدارماندارى مەن كورەرمەندەرى ءۇشىن مۇعجيزا بولعانى انىق. ماقتانىش دەيتىنىمىزدىڭ ءمانىسى ايتپاسا دا ايان، ال ءۇمىت دەيتىنىمىز - «ونەردە شەكارا بولمايدى» دەگەنمەن دە، ديماشتىڭ بۇل باعدارلاماعا قاتىناسۋى جۇڭگو مەن قازاقستان ەكى ەل دوستىعىنىڭ كەرەمەت مىسالى بولاتىنىن بىلاي قويعاندا، ديماش دەگەن ەسىممەن قوسا «قازاق»، «ات پەن ءان قازاقتىڭ قوس قاناتى» دەگەن سوزدەر دە ءجيى ايتىلىپ جاتقانىنا ءبارىمىز كۋامىز، وسى سوزدەردىڭ سالماعى مەن ديماشتىڭ جىبەك مىنەزى، تاۋداي تالانتى ءۇشىن، وسى ءبىر اياۋلى جاننىڭ ساحنادا جۇلدىزداي جارقىراۋىن ءاربىر قازاق بالاسى ۇمىتپەن كۇتكەنى انىق ەدى. ال جۇڭگو حالقى ءۇشىن مۇعجيزا دەيتىنىمىز، باعدارلاما ءتۇسىرىلىمى باستالىپ كۇنى كەشە تاراتىلعانعا دەيىن «انشىگە» قاتىناساتىن ءاربىر ءانشىنىڭ جارنامالارى كۇن سايىن جىبەرىلىپ جاتتى، ديماشتان وزگە انشىلەر ەل ىشىندە ابدەن تانىمال بولعان، اسا مول جانكۇيەرلەر جيناپ ۇلگەرگەنى بەلگىلى. سوندىقتان كوپ ساندى كورەرمەن ديماشتان وزگە انشىلەر ءۇشىن قۋانىپ جاتتى. ال ديماشتىڭ فوتولارىنان ونىڭ ءوڭدى جىگىت ەكەنىن بىردى-ەكىلى عانا ايتقانى بولماسا، تىم نازار اۋدارىپ كەتپەگەن ەدى. سوندىقتان ەل ىشىندەگى ديماشتىڭ جانكۇيەرلەرى باستابىندا تۇگەلدەي ەلىمىز قازاقتارى بولعانى انىق، ال جان سانى ميللياردتان اساتىن جۇڭگوداي الىپ ەلدىڭ الدىندا ءبىزدىڭ از عانا قازاق جانكۇيەرلەرى ديماشتاي تالانت ءۇشىن ازدىق ەتەدى. دەگەنمەن ديماشتىڭ تالانتى مەن تالابىنا، «ءانشى» باعدارلاماسى قويىلا سالىپ جۇڭگونىڭ ءان كەڭىستىگىندە عاجايىپ جارىلىس جاسايتىنىنا وسى از عانا جانكۇيەرلەر قالتقىسىز سەنەتىنى ءشۇباسىز، سەبەبى ول جانكۇيەرلەردىڭ اراسىندا قاراڭداپ ءبىز دە بوي كورسەتىپ جۇردىك. «ءانشى» باعدارلاماسىنا قاتىناسا سالىپ ديماش ءوز اتىندا شينلاڭ ميكرو بلوگىن اشقان بولاتىن. باعدارلامانىڭ سىبىسى ەمىس-ەمىس ەستىلە باستاعاندا، ديماشتىڭ ميكروبلوگىنا تىركەلگەن جانكۇيەرلەر نولدەن وتىز مىڭعا دەيىن كوتەرىلدى. مۇنىڭ 90 پايزى قازاق ەكەنى بەلگىلى. ال كۇنى كەشە «ءانشى» باعدارلاماسى قويىلا سالىپ كوپ وتپەي ديماشتى، ديماش تۋرالى احباراتتى ىزدەۋشىلەر ەل ىشىندەگى ەڭ ۇلكەن سايتتاردا ءبىرىنشى توپ بولىپ كورىندى، ديماش تۋرالى احباراتتار جانە ونى ىزدەۋشىلەردىڭ سانى تۇتاس جۇڭگو كەڭىستىگىن شارلاپ كەتتى دەۋگە ابدەن بولادى. تۋرا سول ساتتەن باستاپ ديماشتىڭ جەكەلىك ميكرو بلوگىنا قوسىلۋشىلار مينوت سايىن مىڭنان ارتىپ وتىردى، ميكرو بلوگىڭىزدى جاۋىپ، قايتا اشقانشا تىركەلۋشىلەر سانى ءسىز ويلاماعان سانعا كوتەرىلىپ وتىردى. باعدارلاما باستالار الدىندا ديماشتىڭ ميكرو بلوگىنا تىركەلگەندەر 30 مىڭ ەدى، ەندى مەن وسى جازبانىىڭ ءسىز وقىپ وتىرعان جەرىنە دەيىن جازىپ كەلىپ قاراعانىمدا 300 مىڭعا كوتەرىلگەن ەكەن. قازاق ەرتەگىلەرىندەگى ساعات سايىن وسەتىن باتىرلار ەسكە تۇسەدى مۇندايدا. وسىلايشا، ديماش جۇڭگوداعى ءان سۇيەر قاۋىمعا مۇعجيزالى سيلىق بولدى.
سونىمەن ارايدىڭ مانەرلەپ تانىستىرۋىمەن ساحناعا كوتەرىلگەن ديماشتىڭ فرانسۋز تىلىندەگى الەمدەگى كۇردەلى ءاندى قانشالىقتى دەڭگەيدە ايتقانىنا وزدەرىڭىز كۋاسىزدار. ونىڭ ساحناداعى كورسەتكەن ونەرىن «ءانشى» باعدارلاماسىنىڭ الەۋمەتتىك جەلىدەگى تەكسەرۋ ناتيجەسىندە «ديماشتى تەك بويى بيىك، ءوڭدى جىگىت ەكەن دەپ ويلاپ ەدىم، ا دەپ اۋىز اشقان ساتىندە اق ونىڭ الدىندا تىزەرلەۋگە شاق قالدىم» دەپ پىكىر ايتۋشىلار جانە وسى پىكىرگە ەرۋشىلەر نەشە ءجۇز مىڭ بولىپ كەتكەنىمەن-اق بەينەلەۋگە بولادى.