قازاق ينتەرنەت تەلەۆيزياسى

89-كەزەكتى وسكار سيلىعى جانە سيلىقتى فيلمدەر

رەداكتور : ىبىراي دۇيسەن | قاينارى : ورتالىق تەلەۆيزيا تورابى | ۋاقىتى : 28-02-2017 09:51

A-A+

كينو الەمىنىڭ نوبەلى سانالاتىن «وسكار» جاڭا عانا (27-اقپان تۇستەن بۇرىن) ءوزىنىڭ 89-كەزەكتى سيلىق تاراتۋ سالتىن اياقتاتتى.
2016-جىل كينو سالاسىندا اسا تابىستى جىل بولدى دەۋگە بولادى. كوپتەگەن ۇزدىك رەجيسسورلار، تالانتتى اكتەرلەر وزدەرىنىڭ ەڭ كەمەلدى تۋىندىلارىن وسى جىلعا جيعان سەكىلدى. ءتۇرلى جانر بويىنشا ۇسىنىلعان كينولاردان جادىدا جاتتالىپ قالعانى از بولمادى. ءار جولى كينوحانادان تاڭداي قاعىپ بيىلعىنىڭ ەڭ ۇزدىك فيلمى وسى شىعار دەپ ويلاپ قايتقانىڭىزدا كوپ وتپەي تاعى ءبىر قىرىمەن تاڭداندىرعان كينولاردىڭ ەسىمى ءاركىمنىڭ كوكەيىندە ساقتاۋلى ەكەنى انىق. ال جىل سايىنعى كينولاردى قورتىندىلاپ، جىلدىڭ ۇزدىگى ەتىپ سايلايتىن بىرنەشە سيلىق ءتۇرى بار. سونىڭ ىشىندە كوپتىڭ نازارىنا ىلىككەن ەڭ ءىرى سيلىق وسى «وسكار» ەدى.
بيىل دا وسكار سيلىعىن تاراتۋ سالتى جىلداعىداي ىعايلار مەن سىعايلار جينالعان، ساحناسى الەم-جالەم، جۇرگىزۋشىسى جۇرتتى كۇلكىگە قارىق قىلاتىن دۋماندى كەش بولىپ باستالدى. وتكەن ءبىر جىلداعى كينولار تۋرالى قورتىندى، كينو ماماندارى مەن ايگىلى اكتەرلەردىڭ باعاسى، جانە سيلىق الۋعا دايىن تۇرعان كينونى كونۆەرتتى اشىپ جاريالاۋ دەگەندەر ءوز رەتىمەن ءوتىپ جاتتى. ايتپاقشى، وسكار 24 ءتۇر بويىنشا سيلىق بەرەدى. ءبىراق ەڭ ەستە قالارلىعى جىلدىڭ ەڭ ۇزدىك اكتەرى (ەر، ايەل)، جىلدىڭ ەڭ ۇزدىك فيلمى، جىلدىڭ ەڭ ۇزدىك رەجيسسورى، ەڭ ۇزدىك سەناري، ەڭ ۇزدىك وپەراتور قاتارلىلار ەكەنى راس. وسى 24 ءتۇردىڭ 14 تۇرىنە ەسىمى ىلىككەن «دۋماندى قالا» فيلمى وزگەشە ستيلىمەن، قايشىلىعىمەن، رومانتيكاسىمەن، ارمان مەن ماحاببات تۋرالى تاقىرىبىمەن كوپتىڭ كوڭىلىنەن ورىن الىپ، بيىلعى جىلدىڭ ەڭ باستى ۇمىتكەرىنە ايلانعان. ال وزگە فيلمدەر تۋرالى ەل ءىشى كورەرمەندەرى تىم قانىق ەمەس ەدى. ەندى تومەندە ماڭىزدى بىرنەشە تۇرلەر بويىنشا سيلىق العان فيلمدەر مەن ادامداردى اتاپ وتەيىك.


ەڭ ۇزدىك فيلم: «ايلى كەشتەگى بالا»
فيلم ءبىر قارا ءتاندى بالانىڭ ەسەيۋ بارىسىندا ءوزىن ىزدەۋىن (تانۋىن) ايتادى. ءوزىنىڭ جان قالاۋى مەن سىرتقى دۇنيەدەگى قاعيدالاردىڭ قاقتىعىسى، سان ءتۇرلى تالعامدار مەن قايشىلىقتىڭ ورتاسىندا جان ازابىن تارتقان بالانىڭ ەڭ سوڭىندا ءوزىن تانۋى، ءوزىنىڭ جىنىستاس عاشىق (گەي) ەكەنىن مويىنداۋى ايتىلادى. سونىمەن بىرگە ناسىلدىك كەمسىتۋ قاتارلى قوعامدىق قايشىلىقتار دا كوتەرىلەدى.

 


ەڭ ۇزدىك رەجيسسور: داميەن چازەللە
«دۋماندى قالا» فيلىمى ارقىلى وسى سيلىقتى جەڭىپ العان داميەن بيىل 32 جاستا، وسكار سيلىعىن ەنشىلەگەن ەڭ جاس رەجيسسور سانالادى.

 


ەڭ ۇزدىك اكتەر (ەر): «تەڭىز جاعاسىنداعى مانچەستر» فيلمى ارقىلى كايسي افلەك
ءوزىنىڭ وتكەن ومىرىنەن قاشاتىن، كوپ سويلەمەيتىن تۇيىق مىنەزدى جىگىت تۋرالى ايتىلادى. جانىنا بالاپ جاقسى كورەتىن اعاسى تۇيىقسىز جۇرەك تالماسىنان قايتىس بولعان سوڭ، اعاسىنىڭ بالاسىنىڭ زاڭدىق قاراۋشىسى بولعانىن بىلگەن ول وتكەن كۇنىنىڭ ەلەسى كوپ، ءبىراق قايتقىسى كەلمەيتىن تۋعان اۋىلىنا كەلەدى. ءارى اعاسىنىڭ بالاسىن الىپ كەتپەكشى بولادى، ءبىراق بالا تۋعان جەرىنەن كەتكىسى كەلمەيدى...

 


ەڭ ۇزدىك ايەل اكتەر (ايەل):  ەمما ستون
«دۋماندى قالا» فيلىمى ارقىلى وسى سيلىقتى جەڭىپ الدى. بۇدان بۇرىن ول وسكار سيلىعى بويىنشا ەڭ ۇزدىك كومەكشى اكتەر سيلىعىن العان بولاتىن.